No compás de espera que se está a vivir no IES Esparís no referenta á construcción do novo centro, a Asociación de Nais e Pais de Alumnos do centro enviou un comunicado aos pais do alumnado para informar da situación actual e dos próximos pasos a seguir pola directiva da mencionada asociación.

A carta dirixida aos proxenitores dos alumnos di textualmente: A Xunta Directiva da ANPA quere informar dos trámites realizados sobre a xestión do novo centro. Na entrevista mantida co Delegado de Educación e coa Dirección do Centro, éste comentounos que estaban barallando a posible ampliación do centro ou a construcción dun novo, en base aos informes que tiñan, comprometéndose antes de finaliza-lo mes de Novembro, a darnos información concreta das decisións da Consellería. Mediante conversación telefónica co Delegado, sabemos que non vai a haber ampliación e que a construcción do novo edificio está condicionada a dispoñer de terreos máis axeitados para o Instituto, así coma buscar unha alternativa ao uso do edificio actual. Parece ser que hai outra Consellería interesada na adquisición do edificio e hai unha oferta por parte do Concello duns novos terreos que sí son do agrado da Consellería de Educación. A petición da ANPA, visitaron o centro dous parlamentarios (do PSOE e o BNG) e se fixeron eco da situación precaria na que están escolarizados os nosos rapaces. Posteriormente, o Delegado nos confirma telefónicamente que “todo vai ben”, non están descartados os prazos previstos (no curso 2006-2007) e intentarase continuar co proceso aberto e adxudicar o concurso adaptándoo aá nova situación, polo que esperamos en breve a firma dun novo convenio. Temos solicitada unha entrevista co Secretario Xeral de Educación para trasmitir a nosa preocupación sobre a demora dos prazos e a dotación presupostaria. Esperamos obter un compromiso en firme a este respecto, na vindeira semana. Na primeira quincena de Decembro, convocaremos unha asamblea para estudiar as medidas a tomar, en función do desenvolvemento dos acontecementos.