Xornada de portas abertas no IES de Brión coa presenza de Víctor Freixanes

O pasado 28 de febreiro o Instituto de secundaria de Brión organizou unha xornada de portas abertas para dar a coñecer as novas instalacións do centro a alumnos, ex alumnos e pais. Dende as 19 horas celebrouse un acto que contou coa presenza do escritor Víctor Freixanes que pronunciou un discurso sobre Xosé María Álvarez Blázquez, autor ao que este ano se dedica o Día das Letras Galegas.

O novo instituto de Secundaria de Brión funciona a pleno rendemento dende hai máis dun mes. Para dar a coñecer as súas novas instalacións a pais de alumnos e ex alumnos e profesores organizouse unha xornada de portas abertas, cun acto que contou coa presenza do coñecido escritor Víctor Freixanes, veciño de Brión e pai de alumnos que foron do antigo centro de Esparís-Viceso.

Mariña Álvarez Rei, profesora do instituto e excepcional escritora, foi a encargada de presentar ao insigne invitado que na súa conferencia comentou diversos aspectos da obra e vida de Álvarez Blázquez, ademais de recitar varios poemas do autor. O acto rematou cunha grande ovación por parte dun auditorio agradecido e emocionado.

O camiño ata conseguir o novo IES de Brión foi longo e non libre de dificultades. Pais, ex alumnos e profesores puxeron o seu grao de area para conseguir que un desexado proxecto, deseñado para mellorar os servizos educativos do noso concello, se convertera nunha realidade que agora gozaremos todos e todas. Para eles foi este acto.