Un cento de persoas de Ames, Brión, Padrón e Santiago participaron na saída da Ruta Rosaliana

Os Concellos de Ames, Brión, Padrón e Santiago organizaron o pasado sábado, 5 de maio, unha visita guiada aos lugares máis emblemáticos do legado rosaliano, dentro do proxecto común denominado "As Pegadas de Rosalía"

Preto dun cento de veciños dos mencionados municipios visitaron os lugares emblemáticos da vida e do legado literario de Rosalía de Castro. A ruta seguiu o itinerario deseñado polo intelectual Avelino Abuín de Tembra, recentemente recuperado polos catro concellos dentro do mencionado proxecto.

Este itinerario rosaliano comezou en Compostela, no Panteón de Galegos Ilustres, onde se atopan os restos da autora. Alí realizouse a primeira ofrenda floral do día, xa que ademais do centro de flores depositado aos pés da tomba de Rosalía, deixouse unha rosa en cada un dos lugares visitados, nunha clara referencia poética á autora.

A ruta proseguiu no termo municipal compostelán cunha visita á Praza de Vigo, onde Rosalía residiu durante algún tempo. De seguido, os participantes trasladáronse ata o lugar de A Tarroeira (Ortoño, Ames), onde se atopa a casa paterna de Rosalía e onde a autora pasou unha parte da súa primeira infancia.

A seguinte visita recalou no concello de Brión, concretamente na emblemática Igrexa de San Xiao de Bastavales, coñecida polas campás que protagonizaron un dos versos máis afamados da autora e que, nese día tan especial, repicaron para recibir aos visitantes.

Pasado o mediodía, os excursionistas fixeron un pequeno descanso para comer. A parada produciuse no concello de Padrón, onde durante a tarde se realizaron visitas á estatua de Rosalía situada no Espolón, á Casa Museo e á Colexiada de Iria Flavia.

A actividade finalizou na propia Colexiata cun concerto a cargo da cantante Anna Melikhova e a lectura dalgúns poemas. As persoas asistentes gozaron do percorrido e mostraron satisfacción polo desenvolvemento do mesmo e polas explicacións facilitadas polos guías, así como polas actividades que complementaron a ruta, como foron a lectura de poemas, as visitas teatralizadas da man dunha actriz caracterizada como Rosalía e a visita guiada á Casa Museo realizada polo presidente da Fundación, Anxo Angueira.