A campaña Brión Solidario 2018 precisa da túa colaboración

O Concello de Brión lanza un ano mais a campaña Brión Solidario. Unha iniciativa coas datas de Nadal como obxectivo pero que os veciños e veciñas de Brión prolongan ao longo de todo o ano con continuadas achegas, mostra da solidariedade da nosa comunidade coas familias máis desfavorecidas.

Baixo o lema "Brión, territorio solidario" o Departamento Municipal de Servizos Sociais pide a colaboración da veciñanza para crear un "banco de alimentos" a disposición das familias do concello que o precisen. Os produtos demandados son, como de costume, alimentos non perecedoiros, correctamente embalados, especialmente azucre, produtos típicos do Nadal, de hixiene persoal e conservas.

Os puntos de doazón onde se poden realizar as achegas localízanse nos diferentes servizos municipais e no supermercado Froiz de Montebalado. Tamén se aceptan donativos económicos en metálico na Casa do Concello e na oficina de Abanca de Montebalado.

Porque Brión é territorio solidario, non podemos deixar de colaborar con esta nova e necesaria campaña de doazón de alimentos que vai beneficiar, un ano mais, ás familias con menos recursos. Así de doado, así de responsable!