Exposición “Vivencias heteroxéneas, cousas que ver”

O venres 22 de xaneiro, inaugurouse no Espazo das Artes de Brión a mostra “Vivencias heteroxéneas, cousas que ver” , unha escolma do traballo de alumnos de último ano de carreira da Facultade de Belas Artes de Pontevedra.

Dende a súa inauguración, o Espazo das Artes de Brión non descansa no seu empeño de promover no concello as artes plásticas. Nesta ocasión, faino a través dunha exposición que recolle unha selección do traballo realizado ao longo do curso por alumnos e alumnas de último ano da Facultade de Belas Artes de Pontevedra.

Trátase dun mosaico de obras de temática variada que veñen representar un compendio formal, estético e intuitivo das inquedanzas de cada alumno, expresadas a través do formato pictórico ou fotográfico.

Os creadores, Reyes R. Maquieira, Paula Pereira, José Romay, Vanesa Sexto, Tamara Lores, Luis Martínez Romero, Andrea Vila e Susana Viña, encargados de levar a cabo esta iniciativa, presentan, “Vivencias heteroxéneas. Cousas que ver”, un conxunto de 15 obras, coas que inician un novo diálogo cos creadores fora da propia facultade.

A inauguración tivo lugar no Espazo das Artes do Concello de Brión o día 22 de Xaneiro de 2010 ás 20:30 h. A mostra permanecerá aberta ao público dende esta data ata o 30 do presente mes, de luns a venres en horario de mañá (9:00 – 14:00 h.) e tarde (16:00-19:00 h.). Os fins de semana abrirá os sábados de 10:00 a 13:00 horas.