Cincuenta e sete mozos e mozas visitaron andalucía

Un total de 57 mozos e mozas de Brión, de idades comprendidas entre os 18 e os 35 anos, participaron durante esta pasada semana nunha viaxe por Andalucía organizada polo Concello de Brión na que visitaron localidades como Granada, Torre del Mar, Gibraltar, Tarifa, Ronda, Mijas, Porto Banús, Marbella e Málaga.

Os viaxantes saíron de Brión na tarde do domingo 20 de xullo e, despois dunhas quince horas de viaxe, chegaron ata o Albergue Xuvenil de Málaga, onde residiron durante oito días. Neste tempo, fixeron varios percorridos turísticos e culturais da man do Concello de Brión, entre as que destacou a visita á Alhambra de Granada, onde pasaron unha tarde. Os mozos tamén tiveron ocasión de visitar a Cova de Nerja, monumento natural, e a Cova do Tesouro, unhas das tres únicas covas de orixe submarina que se coñecen no mundo e a única existente en Europa.

Málaga é o terceiro destino das viaxes da mocidade organizadas polo Concello de Brión. O ano pasado, a cita foi en Suances (Cantabria) e no 2006 estreouse este programa en Guillena (Sevilla). Unha iniciativa coa que o Concello de Brión pretende ofrecer unha oferta de ocio para os mozos do municipio e, ao mesmo tempo, fomenta-lo compañeirismo entre todos eles.