Brión conta cun dos últimos selleiros galegos

Xosé Ramón García Fraga, veciño de Brión nado na pequena aldea de O Cabo, desenvolve dende fai máis de trinta anos o oficio de "selleiro" no seu pequeno obradoiro, na coñecida como “casa do selleiro�, constituíndo en Galicia unha das derradeiras representacións deste oficio de artesáns. Segundo Xosé Ramón, “a paciencia é fundamental neste oficio.� Xa de neno, con tan só 11 anos de idade, Xosé Ramón gustaba de olla-lo traballo que realizaban os carpinteiros de Outeiro e de O Cabo. Xosé Ramón, ademais, tivera a sorte de ver como traballaba un carpinteiro irmán da súa avoa, un carpinteiro moi admirado do que herdou as súas ferramentas.

Xa de mozo, a inquietude inicial polo oficio reforzouse cunha formación moi importante na Escola de Artes. Nesta institución iniciouse con técnicas de debuxo e modelado. A súa aprendizaxe na Escola de Artes completouse co traballo desenvolvido nun obradoiro de madeira e repuxado.

Segundo Xosé Ramón, un selleiro é un toneleiro, un artesán que traballa as formas redondas. Os principais materiais cos que se traballa son a madeira, moi vella, e o latón. En ocasións puntuais tamén se emprega o cobre, un material co que é mais doado traballar e que a diferencia do latón non soe romper cando é moldeado a golpe de martelo. As pezas máis solicitadas son as baldas, as sellas que conservan moi ben a temperatura da auga, os barrís e os merliños. Pero, Xosé Ramón ten feitas moitas outras pezas, por exemplo: potas de cobre para face-lo polbo ou, de xeito excepcional, linternas para coches antigos. O traballo deste artesán galego, un dos últimos selleiros galegos en activo, soe atopar saída no mercado a través da comercialización en tendas de anticuarios.