Celebrouse unha nova edición da Festa do Cabalo de Brión

Os días 17 e 18 de setembro celebrouse a XXIX edición da Festa do Cabalo de Brión que reuniu nos montes de Rañalonga numerosos afeccionados ao mundo do cabalo procedentes de toda Galicia.

O sábado, arredor das 16:00 h., comezaron as actividades cunha rota a cabalo polas beiras do Río Tambre, que durou preto de tres horas. Esa tarde celebráronse tamén as probas de salto de obstáculos, a unha simpática carreira de burros. No serán a xornada rematou cunha cea de confraternidade que reuniu aos participantes.

Domingo foi o día forte, no que se concentraron a maioría das actividades. Pola Mañá, dende as nove ata a hora do xantar, realizouse un concurso morfolóxico, unha xincana e o concurso de arrastre.

Pola tarde, destacar a embretada de xovencas o reprise de doma e, sobre todo, o espectáculo exhibición de manexo natural de cabalos a cargo do mexicano Chico Ramírez, un dos grandes mestres da comunicación cos cabalos e unha das figuras do mundo en doma ecuestre natural máis destacada. O mexicano, enxeñeiro agrónomo de profesión, utiliza unha disciplina denominada Manexo natural do cabalo, que combina a psicoloxía condutista e a etoloxía (rama da bioloxía que estuda o comportamento dos animais).