A ampliación e remodelación dos camposantos de Os Ánxeles e Boullón custará 385.000 Euros

O Concello de Brión non pasará aos veciños as taxas do Imposto sobre Construccións, Instalacións e Obras (ICIO) nin por licencia urbanística.

Os veciños e veciñas de Brión están a acometer unha profunda remodelación e ampliación do camposanto de Santa María dos Ánxeles e unha ampliación do cemiterio San Miguel de Boullón, uns traballos que contan cun orzamento de 385.000 euros. Unhas obras que non suporán carga algunha en canto a impostos municipais para os veciños e veciñas do municipio que se beneficien destes traballos, toda vez que a Xunta de Goberno local decidíu non pasar as correspondentes taxas municipais que lles serían aplicables.
Deste xeito, o Concello de Brión decidíu non cobrarlles aos veciños nin as taxas do Imposto sobre Construccións, Instalacións e Obras (ICIO) nin as taxas por licencia de obras. Unhas taxas que, no caso do camposanto de Santa María de Os Ánxeles, suporían un desembolso de 10.000 euros e que no caso da ampliación do cemiterio de San Miguel de Boullón sería de 1.725 euros.
A obra máis importante vaise acometer no camposanto de Santa María de Os Ánxeles, cuia remodelación e ampliación está orzamentada en 330.000 euros. As obras consistirán nunha ampliación de 2.610 metros cadrados nun terreo ao que se accede dende o atrio da igrexa e na rehabilitación doutra área, duns 2.420 metros cadrados.
O obxectivo desta obra é facer máis accesible o actual cemiterio, mantendo o seu carácter de plataformas a distinto nivel pero interconectadas por rampas accesibles. Ademais, tal e como reservara o Concello de Brión na elaboración do PXOM, procederase á ampliación do camposanto mediante unha serie de panteóns de 3 alturas. Asemade, dotarase ao cemiterio de aseos públicos, dun espazo para almacenamento de útiles e dunha fonte, que complementarán os traballos de urbanización e axardinamento dos espazos libres. Os veciños e veciñas de Os Ánxeles que se beneficien destas actuacións non terán que pagar ningunha taxa nin pola ampliación ni pola rehabilitación dos nichos.
Pola súa banda, as obras de ampliación do camposanto de San Miguel de Boullón están orzamentadas en máis de 55.000 euros. As obras consisten na ampliación do actual cemiterio na propia parcela existente, de 4.576 metros cadrados. A demanda é de 25 panteóns, conformados por tres nichos cada un en agrupacións de catro alturas.
Ademais, dotarase ao camposanto de Boullón de aseos públicos, espazo para almacenamento de útiles e dunha fonte, xunto coa urbanización e o axardinamento dos espazos libres resultantes. Ao igual ca no caso de Santa María dos Ánxeles, os veciños e veciñas que se beneficien desta ampliación non terán que pagar nin a taxa de licenza de obras nin a taxa do Imposto sobre Construccións, Instalacións e Obras (ICIO).